Trátase dun complexo de aceleradores de electróns para producir luz de sincrotrón, que permite visualizar a estrutura atómica e molecular da materia e estudar as súas propiedades.

Cada ano, o ALBA xera unhas 6.000 horas de luz, que dan servizo a máis de 2.500 membros da comunidade científica e do sector industrial procedentes de institucións españolas (60 %) e tamén doutros países (40 %). Actualmente, a instalación dispón de 13 liñas de luz en funcionamento, destinadas principalmente á investigación nos ámbitos das biociencias, a materia condensada (nanociencia e propiedades magnéticas e electrónicas) e a ciencia dos materiais. Ademais, conta con novas liñas en construción.

O Sincrotrón ALBA está xestionado polo Consorcio para a Construción, Equipamento e Explotación do Laboratorio de Luz de Sincrotrón (CELLS) e está cofinanciado a partes iguais polo Goberno de España e a Generalitat de Catalunya. Forma parte da rede de Infraestructuras Científicas e Técnicas Singulares (ICTS), que están dedicadas á investigación e ao desenvolvemento tecnolóxico de vangarda e máxima calidade, así como a fomentar a transmisión, o intercambio e a preservación do coñecemento, a transferencia de tecnoloxía e a innovación.